कार्यक्रम

आपल्या नावाचा दबदबा भारतात व भारताबाहेरही निर्माण करणा-या ब्राह्मण उद्योजकांच्या प्रदीर्घ मुलाखती हे या संमेलनाचे उल्लेखनीय वैशिष्ट्य! या उद्योजकांशी लीलया संवाद साधण्याची मोठी जबाबदारी प्रसिद्ध मुलाखतकार श्री.सुधीर गाडगीळ यांनी पहिल्यापासूनच घेतली आहे. आत्तापर्यंतच्या स्नेहसंमेलनांमध्ये ज्या उद्योजकांच्या मुलाखती झाल्या त्यात अनेकानेक प्रसिद्ध व्यक्तिमत्वांचा समावेश होता. त्यांच्याबरोबरच प्रसिद्ध महिला उद्योजिकांच्याही यशोगाथा मित्रमंडळींसमोर उलगडल्या गेल्या. ‘PNG‘ व ‘चितळे बंधूं‘ सारख्या उद्योजक घराण्यांचा प्रवास जाणून घेता आला.
तसेच दरवर्षी पुण्यातील ६ ते ७ रिटेल व्यावसायिकांचाही सत्कार या संमेलनात केला जातो, जेणेकरुन त्यांच्या व्यवसायाची माहिती अनेकांपर्यंत पोहोचेल.

कै. दाजीकाका गाडगीळ, कै. रघुनाथ उर्फ भाऊसाहेब चितळे व कै. राजाभाऊ चितळे आदी प्रभृतींच्या लाभलेल्या आश्वासक मार्गदर्शनामुळे ब्राह्मण व्यावसायिक मित्रमंडळाच्या संमेलनाची घोडदौड सुरु आहे. पहिल्या संमेलनापासून शिस्तीचे काटेकोर पालन केले जाईल यावर जास्त भर दिला गेला. तेंव्हापासूनची एक गोष्ट आजही कटाक्षाने पाळली जाते. दरवर्षीच्या संमेलनाच्या शेवटी पुढील वर्षीच्या संमेलनाची तारीख जाहीर करण्याची! तसेच २५ वर्ष पूर्ण होईपर्यंत या संमेलनासाठी स्थळ : मनोहर मंगल कार्यालय आणि वेळ:  संध्या.६ : ३० ते ९:००  यात कधीही बदल झालेला नाही. संमेलनाच्या अशा मोठ्या कार्याची धुरा कार्यालयाचे श्री.मनोहर मेहेंदळे व परिवार यांनी कायमच सांभाळली आहे.